Vriendskap is voorwaar ’n geskenk van God!
 |
| Die Vriendskap Skatkis |
Hierdie afgelope
naweek het ons die voorreg gehad om te kuier saam met “ou” vriende. Na afloop
van ’n Sabbat wat oorgeloop het van ’n vreugde wat deur woorde nie omskryf kan
word nie, het my vriendinne en ek rondom die klavier bymekaargekom.... soos die
ou dae....
Ons het gesing en
gelag tot my vingers gepyn het van die kinderlike entoesiasme waarmee ek die
klawers beetgepak het!
Die manne het maar net kop geskud en
gelag terwyl hulle desperaat probeer het om ’n gesprek te voer wat hoorbaar was
bo die “vreugdevolle geraas” van hulle eggenotes.
Ek is oortuig die jong
tieners het net hulle oë gerol toe hulle hoor hoe hul moeders die ou vergete liedere
uit die ou sangbundels koor en ek wonder nog steeds of die bure gesit en
oorweeg het of hulle by ons moet aansluit en of hulle ons moet aankla vir
rusverstoring!
... maar soos my
vingers oor die klawers gegly het en my stem saam die ou gunstelinge laat hoor
het.... en my oë die glimlagte van my vriendinne geabsorbeer het, het ek die
moegheid en stress en frustrasies van hierdie lewe tussen die melodie voel weg
sypel.
Soos ons in my
pragtige taal sal sê: “Dit was balsem vir my siel!”
Dankie Here vir die reuse
geskenk van vriendskap! Om biddende vriende te hê wat net so verbete aan die
soom van die kleed van Christus vasklou ....net soos ek... is van onskatbare waarde.
Is jy ook ’n biddende
vriend of vriendin vir iemand? Is jy in die hand van God ’n balsem vir ’n ander
se siel? Die Here gebruik mense om mense te heel.
Laat ons omsien na die siele
van ons mense! Vriendskap is die beginpunt...
God's rykste seën vir die week!
Geen opmerkings nie:
Plaas 'n opmerking